चंद्रशेखर बावनकुळे यांच्यावर जमीन घोटाळ्याचा खोटा आरोप करणाऱ्या कथित पत्रकार रामेश्वर दरेकर यांच्याविरोधात FIR दाखल

Khabar 24 Express 3 weeks ago Breaking News, Crime, Khabar24 Exclusive, Maharashtra, State News, खबरें 1 Comment

सोशल मीडियावर दिशाभूल करणारी माहिती पसरवणाऱ्यांवर गुन्हा; अधिकृत कागदपत्रांनुसार बावनकुळे कुटुंबाकडे फक्त २८.४४ एकर जमीन

नागपूर | प्रतिनिधी – खबर 24 एक्सप्रेस : महसूल मंत्री चंद्रशेखर बावनकुळे आणि त्यांच्या कुटुंबीयांविषयी सोशल मीडियावर पसरवण्यात आलेल्या खोट्या माहितीचा अखेर भांडाफोड झाला आहे.

नागपूर शहरातील कोराडी पोलीस ठाण्यात या प्रकरणी FIR दाखल करण्यात आली असून, दिशाभूल करणारी माहिती प्रसारित करणाऱ्यांविरोधात कायदेशीर कारवाई सुरू झाली आहे.

३ एप्रिल २०२६ रोजी रात्री उशिरा दाखल झालेल्या या FIR मध्ये भारतीय न्याय संहिता (BNS) २०२३ अंतर्गत कलम 78(1)(ii) आणि 356(2) अंतर्गत गुन्हा नोंदवण्यात आला आहे. या प्रकरणाचा तपास सध्या सुरू असून, अधिकाऱ्यांनी गंभीरतेने चौकशी हाती घेतली आहे.

सोशल मीडियावरील व्हिडिओमुळे वाद

तक्रारदार निखिल रामचंद्र इंगळे यांनी दिलेल्या माहितीनुसार, फेसबुकवर व्हायरल झालेल्या एका व्हिडिओमध्ये रामेश्वर दरेकर यांनी महसूल मंत्री बावनकुळे आणि त्यांच्या कुटुंबीयांच्या नावावर तब्बल ११४७ एकर जमीन असल्याचा दावा केला होता.

हा व्हिडिओ ३१ मार्च ते ३ एप्रिल दरम्यान मोठ्या प्रमाणावर शेअर झाला आणि त्यामुळे समाजात चुकीचा संदेश गेला. तक्रारीनुसार, या खोट्या दाव्यामुळे बावनकुळे कुटुंबाची बदनामी झाली.

अधिकृत कागदपत्रातून सत्य स्पष्ट

तहसीलदार, कामठी कार्यालयाकडून जारी करण्यात आलेल्या अधिकृत प्रमाणपत्रानुसार, महसूल मंत्री चंद्रशेखर बावनकुळे आणि त्यांच्या कुटुंबीयांच्या नावावर एकूण सुमारे २८.४४ एकर जमीन नोंद आहे.

ही जमीन विविध गावे आणि सर्वे क्रमांकांमध्ये विभागलेली असून, ११४७ एकरचा दावा पूर्णपणे खोटा आणि दिशाभूल करणारा असल्याचे स्पष्ट झाले आहे.

पोलीस तपास सुरू

या प्रकरणात कोराडी पोलिसांनी गुन्हा दाखल करून तपासाला सुरुवात केली आहे. पोलीस निरीक्षक गणेश धुमाळ यांच्याकडे या प्रकरणाचा तपास सोपवण्यात आला असून, सोशल मीडियावर खोटी माहिती पसरवणाऱ्यांवर कडक कारवाई होण्याची शक्यता आहे.

और अंत में:
सोशल मीडियावर व्हायरल होणाऱ्या माहितीची खात्री न करता शेअर केल्यास त्याचे गंभीर परिणाम होऊ शकतात, हे या प्रकरणातून पुन्हा एकदा स्पष्ट झाले आहे. प्रशासनाने नागरिकांना आवाहन केले आहे की, कोणतीही माहिती शेअर करण्यापूर्वी तिची सत्यता तपासावी.