आश्रमशाळेतील अन्नविषबाधेपासून पेपरफुटीपर्यंत: चंद्रशेखर बावनकुळे म्हणाले, कडक कायद्याने गैरप्रकारांना बसणार आळा

महसूल मंत्री चंद्रशेखर बावनकुळे यांनी रविवारी नागपुरात आयोजित पत्रकार परिषदेत राज्यातील विविध महत्त्वाच्या विषयांवर सरकारची भूमिका स्पष्ट केली. धारणी आणि चिखलदरा परिसरातील आश्रमशाळांमधील अन्नविषबाधेची घटना, पेपरफुटीविरोधातील कठोर कायदे, नागपुरातील अतिक्रमण हटविण्याची मोहीम, पावसाची स्थिती, शेतकऱ्यांचे प्रश्न, डिजिटल मालमत्ता नोंदणी तसेच ठाकरे बंधूंच्या आंदोलनासह अनेक मुद्द्यांवर त्यांनी सविस्तर भाष्य केले.

धारणी तालुक्यातील आश्रमशाळेत झालेल्या अन्नविषबाधेच्या घटनेत 69 विद्यार्थ्यांना रुग्णालयात दाखल करावे लागले. प्राथमिक तपासात विद्यार्थ्यांना शिळे अन्न दिल्यामुळे ही घटना घडल्याचे समोर आले आहे. या प्रकरणी धारणी पोलीस ठाण्यात गुन्हा दाखल करण्यात आला असून अन्न व औषध प्रशासन (FDA) स्वतंत्र चौकशी करत आहे. संबंधित सेंट्रल किचनचे संचालक विजय बोथरे यांच्याविरोधातही गुन्हा दाखल करण्यात आल्याची माहिती चंद्रशेखर बावनकुळे यांनी दिली.

आदिवासी भागातील पालकांकडून ‘सेंट्रल किचन’ऐवजी ‘डिसेंट्रलाइज्ड किचन’ची मागणी होत असल्याचे सांगत चंद्रशेखर बावनकुळे म्हणाले की, एका ठिकाणाहून हजारो विद्यार्थ्यांसाठी अन्न तयार केले जात असल्यामुळे एखादी चूक झाली तर त्याचा फटका मोठ्या प्रमाणावर विद्यार्थ्यांना बसू शकतो. त्यामुळे सरकार या मागणीचा गांभीर्याने विचार करत असून भविष्यात योग्य निर्णय घेतला जाईल.

चंद्रशेखर बावनकुळे यांनी सांगितले की, आदिवासी विकास मंत्री अशोक उईके यांनी घटनास्थळी भेट देऊन परिस्थितीचा आढावा घेतला. सरकारने संपूर्ण रात्र परिस्थितीवर लक्ष ठेवले असून सर्व विद्यार्थ्यांवर वेळेत उपचार करण्यात आले. सध्या सर्व विद्यार्थ्यांची प्रकृती स्थिर असून ते सुरक्षित आहेत.

पेपरफुटी करणाऱ्यांची ‘हिंमत होणार नाही’

एमपीएससी आणि इतर स्पर्धा परीक्षांमधील पेपरफुटीच्या घटनांवर बोलताना चंद्रशेखर बावनकुळे म्हणाले की, केंद्र सरकार आणि महाराष्ट्र सरकार हा विषय अत्यंत गंभीरतेने हाताळत आहेत. पंतप्रधान नरेंद्र मोदी यांनी स्वतः या विषयात लक्ष घातले असून पेपरफुटी रोखण्यासाठी विशेष टास्क फोर्सची स्थापना करण्यात आली आहे.

चंद्रशेखर बावनकुळे यांनी सांगितले की, संसदेत पेपरफुटीविरोधात कठोर कायदा आणण्याची प्रक्रिया सुरू आहे. हा कायदा लागू झाल्यानंतर विद्यार्थ्यांच्या भवितव्याशी खेळ करणाऱ्यांवर कठोर कारवाई केली जाईल आणि भविष्यात अशा प्रकारचे गैरप्रकार करण्याची कोणाचीही हिंमत होणार नाही.

जात पडताळणी प्रक्रिया अधिक सुलभ होणार

अनुसूचित जमाती (ST) आणि इतर मागासवर्गीय (OBC) समाजाच्या जात पडताळणी प्रक्रियेत सुलभता आणण्यासाठी विविध समित्या कार्यरत असल्याची माहिती चंद्रशेखर बावनकुळे यांनी दिली. ओबीसी मंत्री अतुल सावे यांनीही यासंदर्भात महत्त्वाचे निर्णय घेतले असून प्रलंबित प्रकरणे लवकर निकाली काढण्याचा सरकारचा प्रयत्न असल्याचे त्यांनी स्पष्ट केले.

हलबा समाजाच्या विविध मागण्यांबाबत महाधिवक्त्यांचे मत मागवण्यात आले असून त्यानंतरच पुढील निर्णय घेतला जाईल, असेही चंद्रशेखर बावनकुळे यांनी सांगितले.

नागपुरात अतिक्रमण हटवण्यासाठी विशेष टास्क फोर्स

नागपूर महानगरपालिकेने प्रथमच स्वतःचा बुलडोझर खरेदी केला असून त्याचा वापर केवळ अनधिकृत अतिक्रमण हटवण्यासाठी केला जाणार असल्याचे चंद्रशेखर बावनकुळे यांनी सांगितले.

आयुक्तांच्या अध्यक्षतेखाली विशेष अतिक्रमण समिती आणि स्वतंत्र टास्क फोर्सची स्थापना करण्यात आली असून शहरभर पुन्हा अतिक्रमणविरोधी मोहीम राबविण्यात येणार आहे. नागपूर शहर अतिक्रमणमुक्त करण्यासाठी प्रशासनाला आवश्यक त्या सर्व सूचना देण्यात आल्याचेही त्यांनी स्पष्ट केले.

शेतकऱ्यांच्या नुकसानीवर सरकारचे लक्ष

पावसातील खंड आणि दुबार पेरणीच्या शक्यतेबाबत बोलताना चंद्रशेखर बावनकुळे म्हणाले की, प्रत्येक मंत्रिमंडळ बैठकीत धरणांतील पाणीसाठा, मदत व पुनर्वसन तसेच पीकस्थितीचा सविस्तर आढावा घेतला जातो.

दुबार किंवा तिबार पेरणीची वेळ आल्यास शेतकऱ्यांना तातडीने मदत करण्यासाठी महसूल विभाग सज्ज असून प्रत्येक जिल्ह्यातील परिस्थितीवर सातत्याने लक्ष ठेवले जात असल्याचे त्यांनी सांगितले.

डिजिटल मालमत्ता नोंदणीबाबत नागरिकांना आवाहन

डिजिटल मालमत्ता नोंदणीसाठी सरकारने अनेकदा मुदतवाढ दिली असली तरी नागरिकांनी वेळेत प्रक्रिया पूर्ण करावी, असे आवाहन चंद्रशेखर बावनकुळे यांनी केले. वारंवार संधी देऊनही नियमांचे पालन न झाल्यास पुढील कारवाई अपरिहार्य ठरेल, असेही त्यांनी स्पष्ट केले.

रस्ते खोदकामासाठी समन्वय समितीची तयारी

जलवाहिन्या, केबल आणि इतर विकासकामांसाठी वारंवार रस्ते खोदले जात असल्यामुळे सरकारी निधीचा अपव्यय होत असल्याचे चंद्रशेखर बावनकुळे यांनी सांगितले. यावर तोडगा काढण्यासाठी सर्व विभागांमध्ये समन्वय साधणारी स्वतंत्र समिती स्थापन करण्याचा सरकारचा विचार आहे.

भूमिगत केबल, पाइपलाइन आणि इतर सुविधा आधीच शोधून काढण्यासाठी आधुनिक तंत्रज्ञानाचा वापर करण्यात येणार असून त्यामुळे अनावश्यक रस्ते खोदकाम टाळण्यावर सरकार भर देणार असल्याचे त्यांनी सांगितले.

ठाकरे बंधूंच्या आंदोलनावर बावनकुळेंचा टोला

राज ठाकरे आणि उद्धव ठाकरे यांच्या संयुक्त आंदोलनाबाबत विचारले असता चंद्रशेखर बावनकुळे यांनी मिश्कील शब्दांत प्रतिक्रिया दिली. “बेगानी शादी में अब्दुल्ला दिवाना… बँड वाजवत आहेत, बारसं कोणाचं आणि वारस कोणाचा हेच कळत नाही. त्यांना त्यांचं करू द्या,” असा टोला त्यांनी लगावला.

यावेळी चंद्रशेखर बावनकुळे यांनी पुन्हा एकदा पंतप्रधान नरेंद्र मोदी यांच्या नेतृत्वाचे कौतुक करत पेपरफुटी रोखण्यासाठी केंद्र सरकार कठोर पावले उचलत असल्याचे सांगितले. विद्यार्थ्यांच्या भवितव्याशी खेळ करणाऱ्यांवर कोणतीही दया दाखवली जाणार नाही आणि कठोर कायद्यांच्या माध्यमातून अशा गैरप्रकारांना कायमचा आळा घातला जाईल, असा विश्वास त्यांनी व्यक्त केला.

Share on Facebook

Tweet

Follow us

Save