रणरणत्या उन्हात गोसेवकाची हाक; गोमातेच्या अंत्यसंस्कारासाठी जेसीबी उशिरा, रोहित महाले व्यथित

Bhusawal News | Bureau Report Akash Dhake | Khabar 24 Express

भुसावळ शहरात ४५ डिग्री कडक उन्हाच्या पार्श्वभूमीवर मुक्या प्राण्यांसमोरील धोका वाढत असताना, २८ एप्रिल रोजी एकाच दिवशी चार गोमाता व गोवंश दगावल्याची धक्कादायक घटना घडली. या पार्श्वभूमीवर गोसेवक रोहित महाले यांनी अत्यंत वेदनादायी परिस्थितीत मृत गोमातांच्या अंत्यसंस्कारासाठी धडपड केल्याचे समोर आले आहे.

नेहमीप्रमाणे नगरपरिषदेकडून जेसीबी मशीनची मदत मिळत असताना, यावेळी मात्र वेळेवर सेवा उपलब्ध न झाल्याने महाले यांना मोठ्या अडचणींचा सामना करावा लागला. रणरणत्या उन्हात मृत गोमातांचे हाल होत असल्याचे पाहून ते भावनिक झाले. “जगाची आई देवाघरी गेली, तिसरा दिवस निघाला, पण अंत्यसंस्कारासाठी साधन नाही,” अशी हळहळ त्यांनी व्यक्त केली.

परिस्थिती गंभीर होत चालल्याने महाले यांनी इशारा दिला की, “जर गोसेवेसाठी आवश्यक जेसीबी व वाहने उपलब्ध झाली नाहीत, तर अन्न-पाणी त्यागून आमरण उपोषणाला बसणार.” दरम्यान, पेट्रोलसाठी गेले असता त्यांची नगरसेवक राज चौधरी यांच्याशी भेट झाली. महाले यांनी त्यांना संपूर्ण घटना सांगितल्यानंतर चौधरी यांनी तातडीने नगरपरिषदेला संपर्क साधून सेवा उपलब्ध करून देण्याचे निर्देश दिले.

यानंतर संध्याकाळी जेसीबी मशीन उपलब्ध झाले आणि चारही गोमातांचे अंत्यसंस्कार करण्यात आले. या घटनेनंतर महाले यांनी देवांचे आभार मानत “जीवात जीव आला” अशी भावना व्यक्त केली.

महाले यांनी प्रशासनाला आवाहन करत सांगितले की, नगरपालिकेला मिळालेली नवीन वाहने ही अशा सेवांसाठीच वापरली जावीत. भविष्यात अशी अडचण निर्माण झाल्यास थेट मुख्यमंत्री यांची भेट घेण्याचा इशाराही त्यांनी दिला.

“गोमाता ही सर्वांची आई आहे. तिच्या सेवेसाठी अधिक परीक्षा घेऊ नका,” असे भावनिक आवाहन करत महाले यांनी प्रशासनाला सजग राहण्याचे आवाहन केले.

ब्यूरो रिपोर्ट – आकाश ढाके, भुसावळ

Share on Facebook

Tweet

Follow us

Save