तिकीट तपासणीतून कोटींचा महसूल; भुसावळ विभागातील ४ कर्मचारी ठरले ‘करोडपती

Bhusawal News | Bureau Report Akash Dhake | Khabar 24 Express

मध्य रेल्वेच्या भुसावळ विभागात तिकीट तपासणीद्वारे महसूल वाढवण्याच्या दृष्टीने उल्लेखनीय कामगिरी नोंदवली जात आहे. वित्त वर्ष 2025–26 मध्ये विभागातील चार तिकीट तपासणी कर्मचाऱ्यांनी प्रत्येकी ₹१ कोटींपेक्षा अधिक महसूल मिळवत ‘करोडपती’ होण्याचा मान मिळवला आहे.

दक्षता, सातत्य आणि कर्तव्यनिष्ठेच्या बळावर या कर्मचाऱ्यांनी तिकीट तपासणी मोहिम प्रभावीपणे राबवून रेल्वेच्या महसूल संरक्षणात मोलाचे योगदान दिले आहे.

या ‘करोडपती’ तिकीट तपासणी कर्मचाऱ्यांमध्ये श्री निसार खान (टीटीआय, भुसावळ) यांनी ₹1.47 कोटी, श्री एस. के. गुप्ता (सीटीआय, भुसावळ) यांनी ₹1.16 कोटी, श्री के. के. पटेल (टीटीआय, भुसावळ) यांनी ₹1.02 कोटी, तर श्री डी. एन. चौधरी (सीटीआय, भुसावळ) यांनी ₹1.00 कोटी इतका महसूल तिकीट तपासणीद्वारे जमा केला आहे.

विशेष म्हणजे, ही यशस्वी कामगिरी केवळ चार कर्मचाऱ्यांपुरती मर्यादित नसून आणखी पाच कर्मचारी ₹१ कोटींच्या उंबरठ्यावर आहेत. त्यामुळे लवकरच या यादीत आणखी भर पडण्याची शक्यता व्यक्त केली जात आहे.

या उल्लेखनीय कामगिरीमुळे रेल्वेच्या महसुलाचे होणारे नुकसान टाळण्यात मोठी मदत झाली असून तिकीट तपासणी विभागाची प्रतिमा अधिक बळकट झाली आहे. संबंधित कर्मचाऱ्यांच्या कार्याची दखल घेत त्यांच्या कार्याचे सर्व स्तरातून कौतुक करण्यात येत आहे.

दरम्यान, मध्य रेल्वेकडून प्रवाशांना आवाहन करण्यात आले आहे की, अधिकृत विक्रेते, रेल्वे स्थानकावरील बुकिंग खिडक्या, एटीव्हीएम किंवा www.irctc.co.in⁠ या संकेतस्थळाद्वारेच वैध तिकीट घेऊन प्रवास करावा. तसेच ‘Rail One’ ॲपद्वारेही तिकीट आरक्षणाची सुविधा उपलब्ध आहे.

विनातिकिट प्रवासाबाबत ‘शून्य सहिष्णुता’ धोरण कायम ठेवत प्रवाशांना सुरक्षित, सन्मानजनक आणि आरामदायी प्रवास अनुभव देण्यासाठी रेल्वे प्रशासन कटिबद्ध असल्याचेही यावेळी स्पष्ट करण्यात आले.

ब्यूरो रिपोर्ट – आकाश ढाके, भुसावळ

Share on Facebook

Tweet

Follow us

Save