भुसावळ महसूल प्रशासनाचा वाळू तस्करांवर कारवाईचा बडगा कायम, जप्त वाळू लाभार्थ्यांना वाटपाचा निर्णय

भुसावळ | 3 जुलै 2025 — वाघुर नदी पात्रातील अवैध वाळू उत्खननावर अंकुश ठेवण्यासाठी भुसावळ महसूल विभागाकडून कारवाईची मालिका सुरूच आहे. तहसीलदार नीता लबडे यांच्या मार्गदर्शनाखाली महसूल पथकाने जोगलखेडा शिवारात धडक कारवाई केली.

पथकाने जंगल सदृश्य भागात ४ ते ५ ठिकाणी अंदाजे ४ ते ५ ब्रास वाळूचे अवैध साठे आढळून आणले. संबंधित वाळू साठ्याचे पंचनामे करून ती वाळू जप्त करण्यात आली असून, ती भानखेडा येथील जिल्हा परिषद शाळा परिसरात हलवण्यात आली आहे. या वाळूची ताबा भानखेडा पोलीस पाटलांकडे देण्यात आला आहे.

राज्य शासनाच्या घरकुल लाभार्थ्यांसाठी मोफत वाळू वाटपाच्या निर्णयानुसार, जप्त केलेल्या वाळूचा उपयोग जोगलखेडा व भानखेडा गावातील लाभार्थ्यांना प्रति व्यक्ती २ ब्रास प्रमाणे ४ जुलै २०२५ रोजी करण्यात येणार आहे. याबाबत ग्रामपंचायत व महसूल अधिकाऱ्यांना स्पष्ट सूचना देण्यात आल्या आहेत.

तहसीलदार नीता लबडे यांनी शेळगाव बॅरेज मध्यम प्रकल्पाजवळील पुलाच्या कामाची पाहणी केली असता, तेथेही अंदाजे ६० ब्रास वाळूचा साठा सापडला. या साठ्याची सुद्धा चौकशी करून तो जप्त करण्यात येणार आहे. तसेच, रस्ता बांधकामासाठी वापरलेला मुरूम आणि माती यांचेही पंचनामे करून त्याचा उपयोग घरकुल लाभार्थ्यांसाठी करण्याचे आदेश देण्यात आले.

या संपूर्ण कारवाईत मंडळ अधिकारी प्रवीण पाटील, तलाठी मिलिंद तायडे, नितीन केले, रोशन कापसे, शितल अवस्थी, निशा गायकवाड, कोतवाल जितेश चौधरी, पोलीस पाटील भूषण पाटील व शरद पाटील यांचा सक्रिय सहभाग होता.

या भागातील अवैध गौण खनिज उत्खनन आणि वाहतूक रोखण्यासाठी पोलीस विभागालाही पत्र पाठवण्यात आले आहे.

ब्यूरो रिपोर्ट – आकाश ढाके, भुसावळ

.

.

Share on Facebook

Tweet

Follow us

Save