भुसावळच्या नगराध्यक्ष गायत्री भंगाळे अपात्र; शासनाचा आदेश जारी

Bhusawal Breaking News | Bureau Report Akash Dhake | Khabar 24 Express

भुसावळ : येथील लोकनियुक्त नगराध्यक्षा गायत्री भंगाळे यांचे जात प्रमाणपत्र अवैध ठरल्यानंतर अखेर त्यांना पदावरून अपात्र ठरविण्यात आले असून, यासंदर्भातील शासकीय आदेश आज जारी करण्यात आला आहे.

अलीकडेच पार पडलेल्या लोकनियुक्त नगराध्यक्षपदाच्या निवडणुकीत भुसावळचे नगराध्यक्षपद अनुसूचित जाती महिला या प्रवर्गासाठी राखीव होते.

राष्ट्रवादी शरदचंद्र पवार गटाकडून गायत्री भंगाळे यांनी उमेदवारी अर्ज दाखल केला होता. त्यांनी अर्जासोबत अनुसूचित जाती प्रवर्गातील असल्याचे भुसावळच्या प्रांताधिकाऱ्यांकडून मिळालेले प्रमाणपत्र सादर केले होते. या निवडणुकीत त्यांनी मंत्री संजय सावकारे यांच्या पत्नी रजनीताई सावकारे यांचा पराभव करत विजय मिळवला होता.

मात्र, त्यांच्या जात प्रमाणपत्राबाबत आक्षेप घेण्यात येत तक्रारी दाखल झाल्या होत्या. यावर जात पडताळणी समितीकडून चौकशी करण्यात आली. काही दिवसांपूर्वीच समितीने त्यांचे जात प्रमाणपत्र बनावट असल्याचा महत्त्वपूर्ण निष्कर्ष नोंदवला होता. त्यामुळे त्यांच्या अपात्रतेचे संकेत मिळत होते.

दरम्यान, शासनाने जारी केलेल्या आदेशानुसार २३ एप्रिल रोजी संबंधित जात प्रमाणपत्र अवैध ठरविण्यात आले असून, भूतलक्षी प्रभावाने त्यांना नगराध्यक्षपदावरून अपात्र करण्यात येत असल्याचे नमूद करण्यात आले आहे. हा आदेश महाराष्ट्र शासनाच्या सहसचिव विद्या हम्पय्या यांच्या स्वाक्षरीने प्रसिद्ध करण्यात आला आहे.

या घडामोडीमुळे भुसावळच्या राजकीय वर्तुळात मोठी खळबळ उडाली असून, पुढील राजकीय समीकरणांवर त्याचा परिणाम होण्याची शक्यता व्यक्त केली जात आहे.

ब्यूरो रिपोर्ट – आकाश ढाके, भुसावळ

Share on Facebook

Tweet

Follow us

Save