तप्त उन्हात पक्ष्यांसाठी ताप्ती पब्लिक स्कूलचा स्तुत्य उपक्रम; ‘जीव दया जल सेवा अभियान’ संपन्न

Bhusawal News | Bureau Report Akash Dhake | Khabar 24 Express

भुसावळ शहरातील तापमान ४५ अंशांच्या पुढे गेल्याने नागरिकांसह पशु-पक्ष्यांनाही तीव्र उन्हाचा फटका बसत आहे. पाण्याच्या शोधात पक्ष्यांची होणारी वणवण लक्षात घेऊन येथील ताप्ती पब्लिक सीबीएसई इंग्लिश मिडीयम स्कूलच्या विद्यार्थ्यांनी ‘जीव दया जल सेवा’ अभियान राबवत माणुसकीचा आदर्श घालून दिला आहे.

या उपक्रमांतर्गत शाळेच्या प्राचार्या नीना कटलर, उपप्राचार्या मनप्रीत कौर अरोडा व श्रद्धाली घुले यांच्या मार्गदर्शनाखाली शिक्षक आणि विद्यार्थ्यांनी शाळेच्या गच्चीवर तसेच परिसरातील झाडांवर व झाडाखाली मातीची भांडी ठेवली आहेत. या भांड्यांमध्ये दररोज स्वच्छ पाणी भरले जात असून पक्ष्यांच्या पिण्याची व आंघोळीची उत्तम सोय करण्यात आली आहे.

या मोहिमेत ९ वीच्या विद्यार्थ्यांनी विशेष पुढाकार घेतला असून पर्यावरण मंडळाच्या सदस्यांनी पाण्याची भांडी नियमित स्वच्छ ठेवण्याची आणि त्यामध्ये ताजे पाणी भरण्याची जबाबदारी आनंदाने स्वीकारली आहे.

यावेळी प्राचार्या नीना कटलर म्हणाल्या की, “मुक्या जीवांवर दया करणे हीच खरी माणुसकी आहे. उन्हाळ्याच्या कठीण काळात निसर्गाचे रक्षण करणे ही प्रत्येकाची जबाबदारी आहे.” त्यांनी प्रत्येकाने आपल्या घराजवळ किमान एक भांडे पाणी ठेवण्याचे आवाहनही केले.

या उपक्रमासाठी व्हॉईसप्रिंसिपल श्रद्धाली घुले, मनप्रीत कौर, मुकेश कोळी, आकाश परदेशी, डॅनियल पवार, महेंद्र सूर्यवंशी, सोनाली मुजुमदार आणि हर्षला पाटील यांचे सहकार्य लाभले. ताप्ती पब्लिक स्कूलच्या विद्यार्थ्यांच्या या उपक्रमाचे शहरभर कौतुक होत आहे.

ब्यूरो रिपोर्ट – आकाश ढाके, भुसावळ

Share on Facebook

Tweet

Follow us

Save