नागपूर खंडपीठाचा मोठा आदेश : राज्यातील सर्व नगरपरिषद व नगरपालिका निवडणुकांची मतमोजणी आता थेट 21 डिसेंबरला

राज्यात सुरू असलेल्या नगरपरिषद आणि नगरपालिका निवडणुकांच्या प्रक्रियेत मुंबई उच्च न्यायालय – नागपूर खंडपीठ यांनी आज अत्यंत महत्त्वाचा आणि मोठा निर्णय दिला आहे.

उद्या म्हणजेच 2 डिसेंबर रोजी होणारी मतमोजणी स्थगित करत, ती थेट 21 डिसेंबर रोजी एकत्रितपणे घेण्याचा आदेश न्यायालयाने दिला आहे. या निर्णयामुळे राज्यातील राजकीय वातावरण चांगलेच तापण्याची शक्यता आहे.

न्यायालय नेमकं काय म्हणालं?

“निवडणूक प्रक्रिया पूर्णपणे पारदर्शक आणि निष्पक्ष राहण्यासाठी सर्व ठिकाणची मतमोजणी एकाच दिवशी होणे अत्यंत आवश्यक आहे,” असे स्पष्ट मत न्यायालयाने याचिकेवर सुनावणी करत व्यक्त केले.
त्यामुळेच आधी नियोजित असलेली 2 डिसेंबरची मतमोजणी रद्द ठरवत 21 डिसेंबरला एकत्र निकाल जाहीर करण्याचा आदेश दिला आहे.

2 डिसेंबरचे मतदान होणारच, मात्र निकाल 21 डिसेंबरला

न्यायालयाने हेही स्पष्ट केले की:

• 2 डिसेंबरची मतदान प्रक्रिया नियोजित वेळापत्रकानुसार होणार आहे.
• 20 डिसेंबर रोजी ज्या ठिकाणी मतदान होणार आहे, त्यानंतरच सर्व ठिकाणचे निकाल 21 डिसेंबरला जाहीर होतील.
• आचारसंहिता कायम राहणार आहे.
• एक्झिट पोलही थेट 20 डिसेंबरनंतरच जाहीर करता येणार आहेत.

निवडणूक आयोगावर न्यायालयाची स्पष्ट तंबी

निवडणूक प्रक्रिया अधिक पारदर्शक ठेवण्यासाठी निवडणूक आयोगाने पुरेशी खबरदारी घेतली नाही, असा थेट ठपका न्यायालयाने ठेवला आहे. याच निष्काळजीपणामुळेच मतमोजणी पुढे ढकलण्याचा कडक आदेश देण्यात आल्याचे कोर्टाने स्पष्ट केले.

काही ठिकाणच्या निवडणुका 20 डिसेंबरपर्यंत पुढे ढकलल्या

राज्यातील काही ठिकाणी:

• नामनिर्देशनासंबंधी प्रकरणे प्रलंबित,
• वेळ अपुरी असल्याने प्रक्रिया अपूर्ण,

या कारणांमुळे काही नगरपरिषद आणि नगरपालिका निवडणुका 20 डिसेंबरपर्यंत पुढे ढकलण्यात आल्या आहेत.
या मुद्द्यावर औरंगाबाद खंडपीठ येथेही सुनावणी पार पडली होती.

राजकीय वातावरण तापण्याची शक्यता

मतमोजणी एकाच दिवशी होणार असल्याने:

• राजकीय पक्षांची तणावपूर्ण प्रतीक्षा वाढणार
• एका दिवसात संपूर्ण राज्याचा निकाल समोर येणार
• सत्ता समीकरणांवर मोठा परिणाम होणार

असे चित्र सध्या राज्यभर पाहायला मिळत आहे.

ब्यूरो रिपोर्ट : आकाश ढाके, भुसावळ

Share on Facebook

Tweet

Follow us

Save