भुसावळ : तहसीलदार निता लबडे यांच्या विरोधात चौकशीचे आदेश; जप्त जेसीबी प्रकरणावर विभागीय आयुक्तांची दखल

Akash Dhake | भुसावळ : भुसावळ येथील तहसीलदार निता लबडे यांनी पदाचा गैरवापर केल्याचा गंभीर आरोप समोर आला आहे. जप्त केलेले जेसीबी वाहन कोणतीही कागदपत्र तपासणी न करता आणि दंड आकारणी न करता सोडून दिल्याच्या तक्रारीची दखल घेत विभागीय आयुक्त प्रविण गेडाम यांनी चौकशीचे आदेश दिले आहेत.

ही तक्रार सामाजिक कार्यकर्ते आणि माहिती अधिकार कार्यकर्ते केदारनाथ सानप यांनी विभागीय आयुक्त, नाशिक विभाग नाशिक यांच्याकडे दाखल केली होती. विभागीय आयुक्त प्रविण गेडाम यांनी जिल्हाधिकारी जळगाव यांना शासन नियमांनुसार चौकशी करून आवश्यक ती कारवाई करण्याचे आदेश दिले आहेत.

मिळालेल्या माहितीनुसार, वरणगाव परिसरात दिनांक १४ जुलै २०२५ रोजी विशेष तपासणी मोहिम राबविण्यात आली होती. तहसीलदार निता लबडे यांच्या मार्गदर्शनाखाली मंडळ अधिकारी रजनी तायडे यांच्या नेतृत्वात तलाठी सुप्रिया बिराजदार, रेणुका पाटील, नितीन केले, रोशन कापसे आणि जितेश चौधरी यांच्या उपस्थितीत ही कारवाई पार पडली.

या कारवाईत ट्रॅक्टर, डंपर आणि जेसीबी अशी चार वाहने जप्त करण्यात आली होती. ट्रॅक्टर आणि डंपर यांनी दंड भरून सुटका मिळवली, मात्र संबंधित जेसीबी कोणतीही पडताळणी किंवा दंड न आकारता सोडण्यात आल्याचा गंभीर आरोप करण्यात आला आहे.

या पार्श्वभूमीवर केदारनाथ सानप यांनी १५ सप्टेंबर २०२५ रोजी विभागीय आयुक्तांकडे सविस्तर तक्रार नोंदवली होती आणि तहसीलदार लबडे यांच्यावर कठोर कारवाई तसेच सेवेतून बडतर्फीची मागणी केली होती.

या तक्रारीवर विभागीय आयुक्तांनी ३० सप्टेंबर २०२५ रोजी पत्र क्रमांक मशा-२/कार्य/गोख/ई-टपाल क्र. ६८४६६९७/२०२५ अन्वये जिल्हाधिकारी जळगाव यांना चौकशीचे आदेश दिले आहेत.

ब्यूरो रिपोर्ट : आकाश ढाके, भुसावळ

Share on Facebook

Tweet

Follow us

Save